Eftirvinnu- og yfirvinnukaup
Félag verslunar- og skrifstofufólks Akureyri og nágrenni (FVSA) og Landssamband íslenzkra verzlunarmanna (LÍV) gera heildarkjarasamninga við tvenn samtök vinnuveitenda; Samtök atvinnulífsins (SA) og Félag atvinnurekenda (FA).
Eftir- og yfirvinna samkvæmt samningi FVSA, LÍV, VR og SA:
Dagvinnutími hjá afgreiðslufólki er kl. 9-18 en hjá skrifstofufólki er hann kl. 9-17. Fullt starf er 167,94 klst. á mánuði hjá afgreiðslufólki og 159,27 klst. hjá skrifstofufólki.
Eftirvinna: Greitt er 40% eftirvinnuálag fyrir vinnu starfsfólks utan hefðbundins dagvinnutíma en innan þess tíma sem er skilgreindur sem fullt starf á mánuði eða 100% starf. Frá kl. 12:00 á miðnætti til kl. 7:00 að morgni er eftirvinnuálagið 50%.
Tímakaup afgreiðslufólks í eftirvinnu til kl. 12:00 á miðnætti (40% álag) er 0,8235% af mánaðalaunum fyrir dagvinnu en 0,8529% á tímabilinu frá kl. 12:00 á miðnætti til kl. 7:00 að morgni (50% álag)
Tímakaup skrifstofufólks í eftirvinnu til kl. 12:00 á miðnætti (40% álag) er 0,875% af mánaðarlaunum fyrir dagvinnu en 0.9063% á tímabilinu frá kl. 12:00 á miðnætti til kl. 7:00 að morgni (50% álag).
Yfirvinna er öll vinna sem er unnin utan hefðbundins dagvinnutíma og umfram 171,15 klst. hjá afgreiðslufólki og 162,5 hjá skrifstofufólki. Tímakaup í yfirvinnu er 1,0385% af föstum mánaðarlaunum.
Stórhátíðarvinna:
Stórhátíðarvinna er vinna á nýársdegi, föstudeginum langa, páskadegi, hvítasunnudegi, 17. júní, frídegi verslunarmanna, jóladegi og eftir kl. 12:00 á aðfangadegi og gamlársdegi. Öll vinna sem er unnin á stórhátíðum greiðist með tímakaupi sem nemur 1,375% af mánaðarlaunum fyrir dagvinnu.
Yfirvinna samkvæmt samningi FVSA, LÍV, VR og FA
Yfirvinna er öll vinna sem er unnin utan hefðbundins dagvinnutíma og umfram 157,1 klst. á mánuði sem telst 100% starf. Dagvinnutími samkvæmt þessum samningi er kl. 7-19 alla virka daga.
Tímakaup í yfirvinnu er 1,0385% af föstum mánaðarlaunum hjá þeim sem vinna 100% starf.
Stórhátíðarvinna:
Stórhátíðarvinna er vinna á nýársdegi, föstudeginum langa, páskadegi, hvítasunnudegi, 17. júní, frídegi verslunarmanna, jóladegi og eftir kl. 12:00 á aðfangadegi og gamlársdegi. Öll vinna sem er unnin á stórhátíðum greiðist með tímakaupi sem nemur 1,375% af mánaðarlaunum fyrir dagvinnu.